Psalms 110

Ra Luluai ma ra king nina i ga pilak pa ia

A kakailai kai David.

1Ra Luluai i ga tatike ta kaugu luluai dari:
Una ki ta ra papar a limagu tuna,
Upi ina vadiop kaum lavur ebar upi ra ruarua na kakim.

2Ra Luluai na tulue vaarike kaum dekdek na buka na varkurai maro Sion;
Una ki na varkurai limlivuan ta kaum lavur ebar.
3Kaum tarai dia ga upi diat a tul tar mule diat ta ra bung ba u varurue diat tana,
Ma diat a mamar ma ra gomgom na minamar;
U vatur vake kaum lavur barmana dia da ra mavoko i vana rikai ta ra lar.

4Ra Luluai i tar vavalima ma pa na pukue ra nuknukina;
U a tena tinabar tukum
Varogop ma Melkisedek.

5Ra Luluai, nina i tur ta ra papar a limam tuna,
Na pamar gigi ra umana king ta ra bung ba na vaarike kana kankan tana.
6Na varvarkurai limlivuan ta ra umana Tematana,
Na vabuka ra umana bala na kamara ma ra umana virua;
Na pamar gigi ra umana luluai i ra rakarakan a gunagunan.
Na momo ta ra tava i alir ta ra papar a nga;
Kari na vatur ra uluna urama.
7